एसिया प्रशान्त सम्मेलनमा सामुदायिक रेडियोहरु सम्बन्धी नीतिका बारेमा छलफल

दीपक आचार्य, सीआईएन, योगयाकर्ता, इन्डोनेसिया

इन्डोनेसियाको योगयकर्तामा भैरहेको सामुदायिक रेडियोहरुको चांंैथो अमार्क एसिया प्रशान्त सम्मेलनमा आज सामुदायिक रेडियोहरु सम्बन्धी नीति तथा कानुनका बारेमा छलफल भएको छ । 

विश्वका सामुदायिक रेडियोहरुको छाता संगठन अमार्कले चार÷चार वर्षमा प्रसान्त क्षेत्रको सम्मेलन अन्तरगत ४ दिने सम्मेलन गरेको हो । सम्मेलनमा लैगिंक समावेशीकरण, आप्राबासन, सामुदायिक रेडियोहरुको नीति र साझोदारीका बारेमा छलफल भईरको छ । 

सम्मेलनमा सामुदायिक रेडियोहरुको राष्ट्रिय सञ्जालको बिस्तारका बारेमा २ दिने कार्यशाला सामुदायिक रेडियो प्रसारक संघले सम्पन्न गरि नया मार्गदिशा पनि तय गरेको छ । आजको छलफलमा एसियाका देशहरुका कानुनी समस्याको बारेमा छलफल गर्दै कुनै पनि देशले सामुदायिक रेडियोहरुले गरेको योगदानको कदर हुन नसकेको बताएका छन् । 

फिलिपिन्सका अधिकारकर्मी एवं रेडियोकर्मी इलाङ क्वीजानोले रेडियोलाई आफ्नो देशले सधै आफ्नो अधिनमा राख्ने अवस्था रहेको बताउनु भयो । सामुदायिक रेडियो प्रसारक संघ नेपालका अध्यक्ष सुवास खतिवडाले नेपालका सामुदायिक रेडियोले धेरै महत्वपूर्ण काम गरे पनि राज्यले सामुदायिक रेडियो सम्बन्धी छुट्टै नीति बनाउन नचाएको अवस्थाको बारेमा जानकारी दिनु भयो ।  

आजै भएको विपद व्यवस्थापनमा रेडियोको भूमिका सम्बन्धी छलफलमा सामुदायिक रेडियो प्रसारक संघका कोषाध्यक्ष लक्ष्मण खड्काले २०७२ को बिनासकारी भुकम्प पछि नेपालले गरेका राम्रो अभ्यास र विपदको बेलामा नेपाल जस्तो मुलुकमा रेडियो मात्रै जनतालाई सुचना दिने माध्यम हुने बताउनु भयो । 

कार्यक्रमको सहजिकरण अमार्क एसिया प्यासिफिकका संयोजक सुमन बस्नेतले गर्नु भएको थियो । एसियाको बिभिन्न देशको सहभागिता भएको सम्मेलन भोली नयाँ नेतृत्व चयनका साथ सम्पन्न हुदैछ । सम्मेलनमा एसियाका साथै अन्य मुलुुकका पनि रेडियो बिज्ञ तथा रेडियोकर्मीको सहभागिता रहेको छ । 

आत्मजय विश्वविद्यालयमा भएको कार्यक्रमको इन्डोनेसियाको सूचना तथा सञ्चार मन्त्री रुडियान्टाराले दुई दिन अघि उद्घाटन गर्नु भएको हो ।