जिल्लाकै सुख्खा ठाउँ, चिया खेतीले हराभरा

पर्यटनको सम्भावना पनि उस्तै

बासु भण्डारी, खाँदबारी एफएम

हरियाली चिया बगानका साथै दृश्यावलोकनका लागि पनि राम्रो स्थान भएकाले रिसोर्ट संचालन गर्ने सोंच बनाएको नेपाल चाईना उद्योग बाणिज्य संघ च्याप्टर संखुवासभाका अध्यक्ष पाशाङ शेर्पाको भनाई छ । 

संखुवासभा । पानीको समस्या तथा बाँदर आतंकले गौचरणको रुपमा परिणत भएका सुख्खा ,थुम्की परेका डाँडाहरु हिजोआज दरीलो आम्दानीको स्रोत बन्न थालेका छन् । संखुवासभा जिल्लाको चैनपुर नगरपालिका १० को बानेश्वर र खराङ क्षेत्र जिल्लाकै सुख्खा क्षेत्रको रुपमा परिचित छन् । त्यस क्षेत्रका थुम्की परेका डाँडाहरुमा अर्थोडक्स चियाको खेती हुन्छ । किसानले पनि मनग्य आम्दानी गर्न थालेका छन् । 

पहिलेपहिले सुख्खा क्षेत्रमा हुने मकै, बदाम, भटमासजस्ता अन्न बालीको खेती हुन्थ्यो । त्यसबेला बाँदरले खुब सताउँथ्यो । वर्षभरि मिहेनत गरे पनि बाँदरका कारण मिहेनत अनुसारको बाली भित्राउन किसानले पाउँदैन थिए । बाँदरकै कारण कतिपय किसान बसाई सरेका थिए ।

तर पछिल्लो समय अर्थोडक्स चियाको खेती सुरु भएसँगै गौचरणको रुपमा रहेका डाँडाहरु हरियाली बन्न थालेका छन् । व्यवसायिक चिया खेतीबाट किसानलाई पनि राम्रो फाईदा पुगेको चैनपुर १० खराङ का चिया कृषक घननाथ त्रिताल बताउनुहुन्छ । 

पूर्वमा मादी नगरपालिका, पश्चिममा भोजपुरका प्याउली र जरायोटार उत्तरमा सदरमुकाम खाँदबारी र संसारकै गहिरो अरुण उपत्यका तथा दक्षिणमा तराईका मैदानी भूभागहरुको समेत दृश्यावलोकन गर्न सकिने यस क्षेत्रमा अर्थोडक्स चियाको साथै आन्तरीक तथा बाह्य पर्यटनको सम्भावना बढेको छ । अब होमस्टेका साथै सुविधासम्पन्न होटल संचालनको सम्भावना खोज्नु पर्ने स्थानीय शिक्षक केशव काफ्ले बताउनुहुन्छ । 

पर्यटकिय हिसावले महत्वपूर्ण यसक्षेत्रमा सम्भावनाहरु प्रशस्तै छन् । त्यसैले व्यवसायीहरु पनि यस क्षेत्रमा लगानी गर्न उत्साहित देखिएका छन् । 

कृषि तथा पर्यटन क्षेत्रको विकासका लागि सरकारले उचित नीति बनाई थप लागानीको वातावारण सिर्जना गर्न सके जिल्लाको आर्थिक विकासमा समेत टेवा पुग्ने स्थानीयहरु बताउँछन् ।