बिश्वप्रकाशको रोजाई क्षेत्र नम्बर १

पार्टीले निर्णय गरे ओली संग पनि भिड्ने

ज्ञानेन्द्र निरौला, रेडियो सरगम झापा

नेपाली काँग्रेसका केन्द्रीय सदस्य बिश्वप्रकाश शर्माले मंसीर २१ मा हुने प्रतिनिधि सभाको निर्वाचनका लागि आफ्नो रोजाई झापा क्षेत्र नं. १ नै रहेको बताउनु भएको छ ।

पछिल्लो समय एमाले अध्यक्ष केपी शर्मा ओली बिरुद्ध काँग्रेसले बिश्वप्रकाशलाई उठाउने तयारी गरेको चर्चाका बीच आज रेडियो सरगमसंग कुराकानी गर्दै काँग्रेस नेता शर्माले यस्तो बताउनु भएको हो । 

काँग्रेस नेता शर्माले आफ्नो नाम सर्बसम्मत रुपमा झापा क्षेत्र नं. १ बाट सिफारिस भएको र पार्टीको संसदीय बोर्डको बैठकले समेत झापा १ का लागि उम्मेद्वार निर्णय गरिसकेको बताउनु भयो । शर्माले भन्नु भयो–पार्टीमा छलफल भएकै हो । 

एमाले अध्यक्षसंग प्रतिस्पर्धा गर्ने बारे मसंग पार्टीका नेताहरुले कुराकानी गर्नु भएकै हो ।” शर्माले भन्नु भयो–“मैले लामो समयदेखी काम गर्दै आएको क्षेत्र भनेको झापा १ नै हो त्यसैले मेरो रोजाई पनि झापा १ बाट नै चुनावी मैदानमा उत्रने हो तर पार्टीले निर्णय गरेर झापा ५ मा एमाले अध्यक्ष केपी शर्मा ओलीसंग प्रतिस्पर्धा गराउन मलाई चुनावी मैदानमा पठायो भने पनि म तयार छु ।” 

काँग्रेस केन्द्रीय सदस्य शर्माले आफु पार्टीको ईमान्दार कार्यकर्ता भएकाले पार्टीको निर्णय मान्न तयार भएको बताउँदै आफ्नो स्थायी बसोबास भएको र २०७० को दोस्रो संविधान सभाको निर्वाचनमा समेत आफु झापा १ बाटै चुनावमा प्रतिस्पर्धा गरेको हुनाले मंसीर २१ मा समेत आफु झापा १ बाटै चुनावी मैदानमा उत्रने बताउँनु भयो । 

शर्माले भन्नु भयो “झापा १ कै लागि पार्टीका कार्यकर्ताहरुले मलाई सिफारिस गर्नु भएको छ त्यसको सम्मान गर्नु पनि मेरो कर्तब्य हो ।” एमाले अध्यक्ष ओलीसंगको सभ्भावित प्रतिस्पर्धालाई भने काँग्रेस नेता शर्माले नकार्नु भएन । एमाले अध्यक्ष ओलीसंगको सभ्भावित भिडन्तका बारेमा बोल्दै शर्माले भन्नु भयो चुनावी प्रतिस्पर्धामा केही पनि निर्विकल्प हुँदैन । 

काँग्रेस नेता शर्माले २०६४ को निर्वाचनको प्रसङ्ग स्मरण गर्दै केपी ओली पनि पहिलो संविधान सभामा त्यस क्षेत्रबाट पराजित भईसक्नु भएको छ । त्यसैले ओलीसंग प्रतिस्पर्धा गर्न आफुलाई कुनै अप्ठ्यारो नहुने भन्दै पार्टीले निर्णय गरे उच्च मनोबलका साथ आफु केपी ओलीसंगको चुनावी भिड्न्त गर्न तयार रहेको शर्माले बताउनु भयो । 

यस पटक आफुलाई झापाली मतदाताले संसदमा पु¥याउने बिश्वास ब्यक्त गर्दै संसद जाने बाटो झापा क्षेत्र नं. १ वा क्षेत्र नं. ५ जुन पनि हुन सक्ने शर्माले बताउनु भयो । पार्टीका नेताहरुले देखाउनु भएको बिश्वासलाई सम्मान गर्दै भए पनि आफ्नो रोजाई झापा क्षेत्र नं. १ नै रहेको शर्माले स्पष्ट पार्नु भयो ।