कारबाही र प्रोत्साहनले लोडशेडिङ हट्योः उर्जामन्त्री(अडियोसहित)

वुटवल, चितवन लगायतका ठाउँबाट पनि लोडशेडिङ् चाँडै हटाइने

लोडशेडिङ्सँग नेपाली नागरिक कतिसम्म अभ्यस्त भइसकेका छन् भने, केही समयअघिसम्म दैनिक १८ घण्टा लोडशेडिङ खेपिरहेका काठमाडौँ उपत्यकाबासी हिजोआज लोडशेडिङ् नभएकोमा अचम्म मानिरहेका छन् । विजुलीकाे चुहावट र कालोबजारी नियन्त्रण भएका कारण लोडशेडिङ् अन्त भएको भन्दै उर्जा मन्त्रालयले यो अभियानकै रुपमा पोखरा, लहान पूर्व र पश्चिमका क्षेत्रमा पनि सञ्चालन गर्ने रणनीति बनाएको छ । सिङ्गो मुलुकबाट नै लोडशेडिङ् अन्त गर्ने र जनतालाई उज्यालो दिने अभियानको घोषणा गर्नु भएका उर्जामन्त्री जनार्दन शर्मासँग लिलप्रकाश चन्दले सीआईएन स्टुडियोमा गर्नु भएको कुराकानी ः

'उज्यालो नेपाल' अभियान चलिरहेको बेला 'नेपालको पानी, जनताको लगानी ' अभियान पनि तपाईले सुरु गर्नुभयो, यी दुई अभियानबीच कस्तो सम्बन्ध छ ? 

उज्यालो नेपालको अभियान मैले अघि बढाएको छु । अहिलेको सरकार, प्रधानमन्त्रीको निर्देशमा उज्यालो नेपालको एउटा अभियान लोडसेडिङ्मुक्त गर्ने प्रक्रिया अघि बढेको छ । काठमाडौँ, पोखरा र बागलुङ्सम्मको क्षेत्र मुक्त भइसकेको छ र लहानदेखि पूर्वी भाग पनि लोडशेडिङ्मुक्त छ ।

अव केही भागहरु बाँकी छन् । ती बाँकी भूभागलाई पनि छिट्टै लोडशेडिङ्मुक्त गर्ने योजना र अभियान मैले चलाएको छु । कतिपय ठाउँमा सिस्टमका कारणले समस्या देखिएको छ । धैर्यतापूर्वक प्रतिक्षा गर्नका लागि म जनतासँग अनुरोध गर्न चाहान्छु । 

सँगसँगै दुईदिनअघि मात्र मैले नेपालको पानी जनताको लगानी कार्यक्रम अगाडि बढाउनका लागि वयवसाइट मार्फत प्रतिबद्धतापत्र भर्न आह्वान गरेको छु । यो राष्ट्र निर्माणको अभियान हो । यो राष्ट्रलाई बलियो बनाउने, आत्मनिर्भर बनाउने र जनतालाई पनि धनी बनाउने अभियान भएका कारणले यसमा पनि यहाँहरुको प्रत्यक्ष सहभागिता, सहयोगको अपेक्षा गर्दछु । 

मुलुकलाई नै लोडशेडिङ्मुक्त गर्ने अभियान तपाईले चलाउँदै गर्दा नेता र मन्त्री हुनु त जनार्दन शर्माजस्तो भनेर पनि सामाजिक सञ्जालहरुमा विश्लेषण भइरहेको छ, यस्तो सुन्दा, देख्दा तपाईलाई कस्तो लाग्छ ? 

मेरो आफ्नो क्षमता, मैले पाएको जिम्मेवारीलाई जनताको पक्षमा सदुपयोग गर्नुपर्छ भन्ने मेरो मान्यता हो । कामहरुलाई चुनौति खडा गरेर गर्नुपर्छ भन्ने मेरो बानी छ । अहिलेको लोडशिङ्मुक्त गर्ने अभियान एउटा चुनौतिको रुपमा मैले आफैलाई खडा गरेको कुरा हो । मैले त्यही अनुसारको टिम निर्माण गरेको हुँ र मेरो छनौट पनि सही रहेछ भन्ने कुरा अहिलेको प्रतिक्रियाबाट म स्पष्ट छु, खुशी नै छु । 

लेडशेडिङ्मुक्त अभियान चलाउने बेलामा चुनौतिको कुरा गर्नुभयो, यो भनेको भौतिक, नैतिक वा अरु कुनै प्रकारको चुनौति आउँदा रहेछन् ? 

अरु चुनौतिसँग त मलाई त्यति सरोकार छैन । लोडशेडिङ् १८ घण्टा÷१६ घण्टा हुने देशमा लोडशेडिङ् अन्त्य गर्छु भनेर घोषणा गर्ने कुरा आफैमा चुनौतिपूर्ण कुरा हो नि, त्यसका लागि व्यवस्थापन गर्ने कुरा चुनौति त छ नि अहिले । त्यसकारणले जनतालाई मैले अनुरोध गरेको छु र साथ पनि पाएको छु ।

जनताले साथ दिएका कारण यो कुरा अघि बढेको छ । क्रमशः देशैभरी लोडशेडिङ् अन्त गर्ने योजना बनाएर त्यो कार्यान्वयनकै क्रममा छ । त्यसका लागि पावरको व्यवस्थापन गुपर्यो । विजुली नभइकन त लोडशेडिङ अन्त हुँदैन । त्यसको लागि हामीले बिभिन्न ढङ्गले उद्योगहरुलाई २० घण्टा विजुली दिएर पिक आवरमा एक खालको व्यवस्था अहिले गरिरहेका छौँ । 

दिउँसै देख्ने सपनाको रुपमा लिन्छन् कतिपयले लोडशेडिङ्मुक्त गर्ने कुरा, कतिपयले आवश्यकता भन्दा बढी जलविद्युत आयोजना चलाएर सरकारले लोडशेडिङ् कम गरेको भनेर सरकारकारको आलोचना पनि गरिरहेका छन् । वास्तविकता के हो ?

जनताप्रति इमान्दार भएर, दृढ इच्छाशक्तिकासाथ लागेको कारणले भएको हो । अरु केही पनि होइन, मेरो विशेष क्षमता भएर पनि होइन । मेरो एउटै दृष्टिकोण भनेको जनताप्रति उत्तरदायी हुनुपर्छ । यो जनताले दिएको पद् हो मलाई, म जनताको बाहेक अरु कुरा गर्नु हुँदैन भन्ने ठान्छु ।

इमान्दारीकासाथ जनताप्रति उत्तरदायी भएर काम गर्नुपर्छ भन्ने मान्यताकासाथ योजना बनाएँ, टिम बनाएँ, घोषणा गरेँ र काम पनि गरेँ । प्राधिकरण मातहका दसौँ हजार कर्मचारीलाई परिचालन गर्दाको प्रतिफल यो हो,अरु केही पनि होइन । 

अनावश्यक रुपमा गइराखेको विजुलीलाई व्यवस्थापन गरेर यो प्रतिफल आउन सम्भव भएको हो कि होइन ? 

हो, यो व्यवस्थापन मै मुख्य कुरा हो । व्यवस्थापनबाटै यो सम्भव भएको हो । व्यवस्थापनबाट तत्काल समस्या समाधान गर्ने, मान्छेहरु खटाउने र सम्भव भएसम्मका उपायबाट थप व्यवस्थापन गर्ने प्रक्रियाबाट यो सब भएको हो । 

बिजुली व्यवस्थापन गर्ने नाउँमा सरोकारवाला निकायमा रहेका व्यक्तिले भ्रष्टाचार गरेकै कारणले नेपाली जनताले लोडशेडिङ् खेप्दै आउनुपरेको पनि पाउनुभयो ? 

साउनको महिनामा पनि नेपालमा लोडशेडिङ् किन भयो त ? किन भयो ? प्रश्न त जनताले स्वभाविक रुपमा उठाएका छन् । किन भयो भन्दाखेखि कहीँ न कहीँ त्यहाँ समस्या थियो । जनताप्रतिको इमान्दारिता थिएन, जनताप्रति इमान्दार हुनुको सट्टा व्यक्तिगत स्वार्थप्रति लाग्नुको कारणले हो, अहिले म यति मात्र भन्न चाहान्छु । 

लोडशेडिङ्मुक्त गर्ने अभियानमा असहयोग गर्ने व्यक्ति र पदाधिकारीलाई उर्जा मन्त्रालयले कारबाही पनि गरिसकेको छ । अँझै कारबाही गर्नुपर्नेपर्ने ठाउँ देख्नु भएको छ कि, यो अभियान सफल पार्नका लागि अव कुनै पनि व्यक्तिमा समस्या छैन ? 

होइन, अहिले पनि मैले दिनदिनै कारबाही गरिरहेको छु । कतिपय ठाउँमा दिनदिनै स्पष्टिकरण लिने काम गरिहेको छु । कारबाही बिभिन्न प्रकृतिका हुन्छन्,गरिराखेको अवस्था हो । जनताले सेवा नपाउँदा, समस्या हुँदा, जनतासँग अरु कुनै स्वार्थपूर्तिको आशय राख्ने गरेको रिपोर्ट आउँदा तत्काल कारबाही गर्ने गरेको छु । हिजो मात्रै पनि मैले स्पष्टिकरण सोधेको थिएँ र आज पनि मैले सोधेको छु ।

कारबाहीको निरन्तर प्रक्रिया एकातिर छ भने प्रोत्साहन पनि सँगसँगै मैले गरेको छु । यसमा काम गर्ने साथीहरुलाई प्रफर्मेन्सका आधारमा जिम्मेवारी दिने, राम्रो काम गर्नेलाईै राम्रो जिम्मेवारी दिने, कम काम गर्नेलाई त्यसै अनुसारको भूमिका दिने गरेको छु । जनताकोबाट लाभ नलिइ प्राधिकरणलाई फाइदामा लिएर उहाँहरुले बढी लाभ लिने, सेवा लिने गरी त्यो कुरा पनि मैले राखेको छु ।

बिभिन्न योजनामा शेयर राखेर त्यसबाट पनि लाभ लिन पाउने व्यवस्था पनि मैले गरेको छु । एकातिर कारबाही र अर्कोतिर प्रोत्साहनलाई मैले सँगसँगै अघि बढाएको छु । कारबाही त निरन्तर रुपमा गरिराख्नुपर्छ । 

काठमाडौँको लोडशेडिङ्को मात्र धेरै चर्चा भइरहेको छ, मुलुकको पूरै भूगोलबाट लोडशेडिङ कहिले हट्छ ? 

पोखरा वरपरका सहर, बागलुङ्सम्म लोडशेडिङ् छैन । तपाईले बुझ्न सक्नुहुन्छ, त्यहाँका स्रोताले सुनिरहनु भएको होला । प्राविधिक रुपले मर्मत गर्ने समयमा कहिलेकाँही जान्छ होला त्यो लोडशेडिङ् होइन । लोडशेडिङ् भनेको नियोजित ढङ्गले विद्युत डाइभर्ट गरेर अन्त पठाउने प्रक्रियालाई बुझ्नुपर्छ ।

लहानभन्दा पूर्वपट्टिको भागमा लोडशेडिङ छैन । वुटवल, चितवन लगायतका ठाउँहरुमा पनि लोडशेडिङ् हटाउनका लागि हामीले प्रयत्न गरिरहेका छौँ । छिटोभन्दा छिटो कसरी गर्न सक्छौँ भनेर हाम्रो सम्पूर्ण ध्यान त्यहीँ केन्द्रित छ । हिजो मात्रै कार्यकारी निर्देशकलाई लोडशेडिङ्को अवस्था तपाई आफै गएर हेर्नुस् भने, लोडसेन्टरमा गएर उहाँले ११ बजेसम्म बसेर हेर्नु भएको छ । योजना बनाउनुस् भनेर त्यसै अनुसार काम पनि भइरहेको छ । हामी छिट्टै देशलाई नै लोडशेडिङमुक्त गर्दैछौँ, गर्नेछौँ । 

लेडशेडिङ् हटाउनेक्रममा मात्र होइन, मुलुकका बिभिन्न जिल्लाका नागरिक वर्षौदेखि बिजुली बाल्ने सपना मात्र देख्न बाध्य छन्, काम गर्ने निकायले नगरिदिएका कारण । तपाईले दिएको निर्देशनको पालना नगर्ने परिपाटी कत्तिको छ उर्जा मन्त्रालय मातहतका निकायमा ? 

पालना गर्ने परिपाटी एक दम कम छ । त्यो कुराको अन्त गर्ने नै मेरो अभियान हो । त्यसलाई अन्त गर्न म सिङ्गो मन्त्रालय, सचिव, कार्यकारी निर्देशक लगायतका अधिकारीलाई जनता समक्ष लैजाने र के समस्या छ जनताको सुन्ने, सुनाउने र त्यहीँ समाधान गर्ने, निर्देशन दिने काम पनि मैले गरिरहेको छु । 

अडियो सुन्नुहोस्