बर्षाका कारण बागलुङको बुर्तिबाङमा पहिरो

दर्जन बढि घरमा क्षति, मध्यपहाडि लोकमार्ग अबरुद्ध

छविलाल पाण्डे, रेडियो ढोरपाटन, बागलुङ

हिजो दिउसो देखिको निरन्तरको बर्षासंगै आएको पहिरोका कारण बागलुङको बुर्तिबाङमा लाखौं मुल्य बराबरको भौतिक क्षति भएको छ ।

 

निरन्तरको बर्षाका कारण बुर्तिबाङ बजार नजिकैको बतासे खोलामा आएको भेल तथा पहिरोका कारण बजारको देवचोक, हस्पिटल लाईन, सिनेमारोड क्षेत्रमा गरी करिब देड दर्जन बढि घरमा क्षति पुगेको छ । रातको १२ बजेदेखि आएको लेदो सहितको भेलका कारण बजारमा मात्रै एक दर्जन कच्चि घर भत्किएको छ ।

 

हिजोदेखि आएको भेलको त्रासका कारण स्थानिय रातभर जाग्राम बस्न बाध्य भएका छन् । डुवान भएका घरहरुबाट स्थानिय बासिद्धारा सरसामान निकाल्ने कार्य बिहानै देखि जारी छ । त्यस्तै आज बिहान ढोरपाटन नगरपालिका वडा नं २ सेरामा समेत पहिरोका कारण एक घरमा क्षति पुगेको छ ।

 

लागतारको बर्षातका कारण मध्यपहाडि लोकमार्ग अन्र्तगत बागलुङ— बुर्तिबाङ सडक खण्ड पनि पुर्ण रुपमा अबरुद्ध भएको छ । त्यस्तै बुर्तिबाङ—निसि, बुर्तिबाङ— ढोरपाटन , बुर्तिबाङ—तमान सडक समेत अबरुद्ध भएको प्रहरीले जनाएको छ ।