दर्जनौ बस्तिको कथा : धारा छ तर पानी आउँदैन (अडियो)

सोविता रिसाल, काठमाडौं ।

दुई साताअघि रिर्पोटिङको लागि सिन्धुपाल्चोक पुग्दा सिन्धुपाल्चोक चौतारा सांगाचोकगढी नगरपालिका वडा नम्बर १० मा पानीकै बारेमा छलफल चलिरहेको थियो ।

भूकम्पपछि पानीको मूल हराए । बस्ति नै काकाकुल देखिए । सदरमुकाम चौतारामा समस्या झन् जटिल देखियो । 

भूकम्पबाट अति प्रभावित १४ जिल्लामा अहिले पुनः निर्माणको काम चलिरहेको छ ।

पिउने पानीकै अभाव छ, सरसफाई, करेसाबारी लगाउने काम असम्भव जस्तै बनेको छ । घर बनाउन पनि पानी चाहिने भएकाले झन् असजिलो थपिएको छ । 

भूकम्पपछि सबैभन्दा धेरै गोरखा, नुवाकोट, सिन्धुपाल्चोक लगायतका जिल्लामा पानीको अभाव भएपछि पुनः निर्माणको काम नै प्रभावित भएको छ । 

२०७२ सालमा गएको भूकम्पका कारण बढि प्रभावित १४ जिल्लामा ७ हजार ७ सय ४१ ओटा खानेपानीका आयोजनामा क्षति पुगेको थियो ।

त्यसमध्ये ३ हजार २ सय १२ ओटा खानेपानीका आयोजनामा पूर्ण रुपमा क्षति पुगेको थियो । 

भूकम्पका कारण प्रभावित भएका खानेपानी आयोजनामध्ये अहिलेसम्म २ सय ९८ खानेपानी आयोजना मात्रै बनेका छन् ।

गोरखा पालुङटार च्याङलीका सुनिता श्रेष्ठले पानीको दुःख त खेप्नु भएको छ नै, फोहोर पानीका कारण रोगले थला पर्लाकी भन्ने चिन्ता पनि बढ्न थालेको छ । 

‘कति बर्ष भयो फोहोर पानी पिउनेपर्ने बाध्यता छ’ उहाँले भन्नुभयो ‘पानीको दुःख मात्रै छैन अब त रोग लागेर ज्यान पनि जाला भन्ने डर भयो ।’

अहिले गाउँमा पानीका आयोजना छन् । धारा पनि छ तर पानी आउँदैन । पानी आउंने दिन धारामा रित्तो ग्रागीको लामो लाईन हुने र पानीकै कारण झगडा हुने गरेको छ ।

पानी अभावले किशोरीहरुलाई सरसफाईमा समेत असजिलो भएको छ । 

महिलाले नै पानीको जोहो गर्नुपर्दा पुरुषभन्दा महिलाहरुलाई बढि दुःख छ ।

सरकारले सन् २०१७ भित्र मुलुकभर सबै घरमा शुद्ध पिउने पानी पुर्याउने लक्ष्य लिएको लिएको थियो ।

तर, सबैलाई खानेपानी दिने भनेको एक बर्षपछिसम्म पनि दर्जनौ बस्तिमा खानेपानीका लागि नै संघर्ष गर्नु परिरहेको छ ।

अडियो सुन्नुहोस्