इजरायलको प्रविधि पहिलो पटक रामेछापमा परिक्षण

विपन्न माझी बस्ती लाभान्वित हुने

राजिव कार्की, रेडियो तिफदी रामेछाप

सोलारको माध्यमबाट पानी तानेर सिंचाई गरिने सुख्खाग्रस्त देश इजरायलको प्रविधि, पहिलो पटक परिक्षणको क्रममा नेपालको रामेछाप जिल्लामा शुरु गरिएको छ ।

सिंचाई विभाग अन्तर्गत नयाँ प्रविधिमा आधारित सिंचाई आयोजनाको ८५ लाख रुपैयाँ लागतमा रामेछापको खाँडादेवीमा नेपालकै पहिलो सोलार लिफ्ट सिँचाई आयोजनाको निर्माण सुरु गरिएको हो ।

सुनकोशी नदी छेउमा इनार निमार्ण गरी करिव ७ सय मिटर माथी निर्माण गरिएको रिजर्भ ट्ंयाकीमा सोलारको माध्यमबाट तानेर जम्मा गरिएको पानीले त्यस क्षेत्रको सय रोपनीभन्दा बढी खेतियोग्य जमिनमा सिंचाई गरिनेछ ।

सिंचाई राज्यमन्त्री अमरसिंह पुन मगरले आयोजनाको निरिक्षणपछि रामेछापका सुख्खाग्रस्त क्षेत्रअन्तर्गत साविकका २९ गाविसमा यो प्रविधि लैजान मन्त्रालयले योजना अघि सारेको बताउनुभएको छ ।

खाँडादेवीमा निर्माणाधिन नेपालकै पहिलो सोलार लिफ्ट सिँचाई आयोजनाबाट विपन्न माझी बस्ती लाभान्वित हुनेछ ।