रेडियो सद्भावको आयोजनामा बाँकेमा स्वास्थ्य शिविर

राप्तिसोनारी गाउँपालिका भवनियापुरका सात सयभन्दा धेरैकाे उपचार

रेडियो सदभाव, नेपालगन्ज

नेपालगन्जको रेडियो सदभावले बाढी प्रभावित बाँकेको राप्ती सोनारी गाउँपालिका तीनस्थित बैजापुरमा आयोजना गरेको स्वास्थ्य शिविरमा सात सयभन्दा बढीको स्वास्थ्य जाँच तथा उपचार गरिएको छ । रेडियोले हिजो एक दिने स्वास्थ्य शिविर आयोजना गरेको हो । 

शिविरमा आएका मध्ये जटिल प्रकृतिका ५० जनाभन्दा बढीलाई बिशेषज्ञ उपचारका लागि नेपालगन्जका अस्पतालमा रिफर गरिएको छ । ‘जेष्चर्स अफ काइन्डनेस ग्रुप’ र नेपालगन्ज मेडिकल कलेजका मेडिकल अफिसरसहितको एक दर्जन बढीको चिकित्सक टोलीले विरामीहरुको उपचार गरेको थियो । 

गाउँमै निशुल्क स्वास्थ्य जाँच र उपचार पाएपछि स्थानीयले आफुहरुलाई विपतका बेला सहयोग पुगेको भन्दै खुसी व्यक्त गरेका थिए । बाढी र डुवानपछि विभिन्न रोगको संक्रमणले स्थानीयबासीहरु विरामी पर्न थालेपछि त्यसलाई नियन्त्रणमा राख्न शिविर गरिएको स्टेशन प्रमुख नवीन गिरीले बताउनुभयो ।

उपचारमा संलग्न डाक्टर ऋषी भट्राईले सिविरमा आएकाहरुमा रुघाखोकी, ज्वरो र छाला सम्बन्धि समस्या बढि देखिएको जानकारी दिनुभयो । 

बाढीपछिको अवस्थामा यस्ता खाले रोगहरु प्राय सर्ने खालको हुने हुँदा सरसफाईमा ध्यान दिन भट्राईले सुझाव पनि दिनुभएको छ । 

बाढी प्रभावितका लागि ‘रेडियो सदभाव बाढी प्रभावित राहत कोष’मा जम्मा भएको रकमबाट कमिलाल थारुको घर निर्माणका लागि राप्तीसोनारी गाउँपालिकामार्फत ६ बण्डल जस्तापाता हस्तान्तरण गरिएको छ । थारुको घर भत्किदा तीन छोरीको मृत्यु भएको थियो ।