पहिरोमा पुरिएर एकै घरका ४ जनाको मृत्यु

रेडियो सिन्धुलीगढी, सिन्धुली

सिन्धुलीमा अबिरल बर्षाका कारण आएको पहिरोले पुरिएर एकै परिवारका ४ जनाको ज्यान गएको छ । सिन्धुलीमाढी २ नम्बर बजारका उदयबहादुर खड्काको परिवारका ४ जनाको ज्यान गएको हो ।

घर माथीबाट आएको पहिरोले पुरिएर उदयबहादुरका ३७ बर्षिया श्रीमति दुर्गाकुमारी खड्का, छोरी १५ वर्षीया शोभा खड्का, छोराहरु १० वर्षीय अनिष खड्का र ८ वर्षीय मनिष खड्काको मृत्यु भएको प्रहरीले जनाएको छ । 

सिन्धुलीमाडीमा दैनिक ज्याला मजदुरी गर्ने उदयबहादुरको परिवार नेपाल पत्रकार महासंघ सिन्धुली शाखाको जग्गामा घर बनाएर बसेका थिए । जिल्ला प्रहरी कार्यालयको आवास भवन नजिकैबाट झरेको पहिरोले घर पुरिएको थियो ।

राती २ बजेतिर पहिरोले घर भत्काएपछि आफू भागेर बाँच्न सफल भएको तर रातिको समयमा हारगुहार गरेपनि उद्वार गर्न ढिलो हुँदा परिवारका सबै सदस्य गुमाउनु परेको उदयबहादुरले बताउनुभयो ।