नवनिर्वाचित वडा सदस्यको हत्या

मनिष खड्का, रेडियो सानीभेरी, रुकुम

रुकुमको पुथाउत्तरगंगा गाउँपालिका ७ जाङमा नवनिर्वाचित वडा सदस्यको हत्या भएको छ । जाङका नवनिर्वाचित दलित महिला सदस्य २७ वर्षिया बयानसरी कामीको हत्या भएको 
जिल्ला प्रहरी कार्यालय रुकुमले जनाएको छ ।

स्थानीयले घटनाका बारेमा प्रहरीलाई खवर गरेका थिए । घटनाको खबर पाएपछि प्रहरी चौकी जाङबाट खटिएको प्रहरी टोलीले श्रीमतिको हत्या आरोपमा श्रीमान ३८ वर्षिय तेजबहादुर कामीलाई पक्राउ गरेको छ ।

घटनामा तेजबहादुररको संलग्नता भएको देखिएपछि उनलाई पक्राउ गरिएको जिल्ला प्रहरी कार्यालयका प्रवक्ता प्रहरी निरिक्षक थम्मनबहादुर रजालीले जानकारी दिनुभयो । मदिरा सेवन गरेर तेजबहादुरले खुकुरी प्रहार गरी श्रीमति बयानसरीको हत्या गरेका प्रहरीले जनाएको छ ।

बयानसरी असार १४ गते भएको दोस्रो चरणको स्थानीय तह निर्वाचनमा पुथाउत्तरगंगा गाउँपालिका ७ मा नेपाली कांग्रेसका तर्फबाट उम्मेदवारी दिएर दलित महिला सदस्यमा निर्वाचित हुनुभएको थियो ।