विद्यालय हिंडेका प्रधानाध्यापकमाथि गोली प्रहार

घाइतेलाई उपचारका लागि काठमाडौं ल्याइयो

काठमाडौं ।

धनुषाको लक्ष्मीनियामा विद्यालय जाँदै गरेका प्रधानाध्यापकमाथि गोली प्रहार भएको छ । लक्ष्मीनिया गाउँपालिकाको विलट साह सर्वोदय मावि सिनुरजोडाका प्रधानाध्यापक नरेन्द्रकुमार शर्मामाथि गोली प्रहार भएको धनुषाका प्रहरी उपरीक्षक लालमणि आचार्यले सीआईएनलाई जानकारी दिनुभयो ।

गोली लागि गम्भीर घाइते प्रधानाध्यापकलाई उपचारका लागि हेलिकप्टरमार्फत काठमाडौं पठाइएको आचार्यले बताउनुभयो । उपचारका लागि अञ्चल अस्पताल जनकपुरमा भर्ना गरिएका शर्मालाई थप उपचारका लागि काठमाडौं ल्याईको हो ।

जनकपुर उपमहानगरपालिका ७ बस्ने प्रधानाध्यापक शर्मा आज बिहानै मोटरसाइकलमा घरबाट विद्यालय जाने क्रममा लक्ष्मीनिया चोकबाट पश्चिम सडकमा मोटरसाईकलमा आएका दुईजनाले गोली हानी भागेका प्रहरी उपरीक्षक आचार्यले बताउनुभयो ।

मोटरसाइकल चालक सोही विद्यालयका शिक्षक आनन्द कुमार मण्डलले २०/२२ वर्षका दुई युवकले मोटरसाइकलको पछाडी बस्नुभएका प्रधानाध्यापक शर्मालाई गोली हानी भागेका जानकारी दिनुभएको प्रहरी उपरीक्षक आचार्यले बताउनुभयो ।

घटनामा सानो हतियारको प्रयोग भएको देखिएको र थप अनुसन्धान भइरहेको उहाँले जानकारी दिनुभयो । के कारणले गोली हानिएको भन्ने विषयमा केही नखुलेको र घटनास्थल र आसपासका क्षेत्रमा प्रहरी परिचालन गरिएको प्रहरी उपरीक्षक आचार्यको भनाइ छ ।