चितुवाको छाला र हड्डी तस्करीमा संलग्न युवा पक्राउ

ललित बोहरा,रेडियो अमरगढी डडेल्धुरा

डडेलधुरा ८ माघ । चितुवाको छाला र हड्डी तस्करीका लागि लुकाएर राख्ने युवक पक्राउ परेका छन् । तस्करीका लागि दुईथान चितुवाको छाला र एक सय ६४ वटा हड्डी लुकाई छिपाई गरेर राखेका डोटीको घण्टेश्वर गाविस वडा नं १ बस्ने प्रेम बहादुर डाँगिलाई प्रहरीले आज पक्राउ गरेको हो ।

उनले डडेल्धुराको आलिताल गाविस वडा नं ९ मा लुकाएर राखेको अवस्थामा दुई दिन पहिले प्रहरीको एक टोलीले ७ फिट लम्बाई, २ फिट २ ईन्च चौडाई भएको एउटा र ६ फिट ४ ईन्च लम्बाई र १ फिट १० ईन्च चौडाई भएको चितुवाको छाला स्थानीय डम्बर बहादुर कार्कीको बाख्राखोरबाट सुराकीको आधारमा बरामद गरिएको जिल्ला प्रहरी कार्यालय डडेल्धुराले जनाएको छ ।

त्यस्तै चितुवाकै जस्तो देखिने ४१ वटा ठुलो र १२३ वटा सानो हडुडी समेत बरामद गरिएको जनाईएको छ । ठूलो मात्रामा यसरी छाला र हड्डी बरामद गरेपछि प्रहरीले तस्करहरुको सक्रिय सञ्जाल हुन सक्नेमा आशंका गरेको छ ।