सडक भासिएपछि सिन्धुली–बर्दिबास सवारी अवरुद्ध

रामेछाप, खोटाङ, ओखलढुंगा, सोलुखुम्बु, सिन्धुलीसहित पूर्व जाने यात्रुलाई समस्या

नारायण श्रेष्ठ, रेडियो तिफदी, रामेछाप

सिन्धुलीको शीतलपाटी गाविसमा पर्ने त्रिवेणी भन्ने ठाउँमा सडक भासिँदा बिपी राजमार्ग अवरुद्ध भएको छ । 
गएराती एक्कासी सडक भासिएपछि सिन्धुली बर्दिबास हुँदै काठमाण्डौ चल्ने गाडी बिच बाटोमै रोकिएको सिन्धुली प्रहरीले जनाएको छ । 

झण्डै २० देखि ३० फिट सडक भासिएको र तल सुनकोशी नदी भएकाले तत्काल बाटो खुलाउन समस्या हुने जिल्ला प्रहरी कार्यालय सिन्धुलीका प्रहरी निरीक्षक उत्तमप्रसाद बरालले जानकारी दिनुभयो । 

सडक भासिएपछि रामेछाप, खोटाङ, ओखलढुंगा, सोलुखुम्बु, सिन्धुली सहित पूर्व जाने यात्रुलाई समस्या भएको छ ।  मान्छे समेत हिँड्न नमिल्ने गरि सडक भासिएको छ । 

आवातजावत गर्ने वैकल्पिक मार्ग काठमाडौ–सित्खा–पकरवास–मन्थली–खुर्काेट अनि खुर्काेट–मन्थली–पकरवास–सित्खा–काठमाडौ प्रयोग गर्न सुझाव सडक डिभिजन कार्यालय खुर्काेटका डिभिजन प्रमुख राकेश महर्जनले सुझाव दिनुभएको छ । 

उहाँका अनुसार वैकल्पिक सडक खोलेर यातायात सुचारु गर्ने प्रयास भईरहेको छ । सडक बिभाग र जाईकाको टोलीसमेत आउने र आजैबाट वैकल्पिक सडकको व्यवस्थाको लागि काम सुरु गरिने उहाँले जानकारी दिनुभयो ।

बाटो छोटो भएकाले पूर्व चल्ने साना गाडी यही सडकबाट चल्ने गरेका थिए । जापान सरकारले बनाइदिएको बीपी राजमार्गमा दुई वर्ष अघिदेखि गाडी चल्न थालेको हो ।